الجمعة، 21 يناير 2011

تحذير من اسرة الحاج اسحق لاهالي الرياض وللاهل بالخرطوم والكوة

تحذير من اسرة الحاج اسحق لاهالي الرياض وللاهل بالخرطوم والكوة (Re: Magdi Is'hag)


Quote: الخبر التالي بصحيفة الوطن العدد رقم 821 بتاريخ 16/8/2005م:-
"أكد والي ولاية الخرطوم د.عبد الحليم إسماعيل المتعافي أن ما حدث من أعمال شغب عقب إعلان وفاة د.جون قرنق لم يكن متوقعاً"
وجاء أيضاً ما يلي على لسان السيد/ الوالي حسب ما ورد بنفس الخبر:-
"... وأوضح الوالي في لقاء سياسي جامع بأمدرمان أنه قبل الأحداث لم يكن لديه أي سلاح، أما بعد الأحداث فقد اقتنيت ثلاثة مسدسات وأشار إلى أن بعض إخوانه فكروا في اقتناء سلاح لأن الظروف أصبحت غير معروفة"


تحذير من اسرة الحاج اسحق لاهالي الرياض وللاهل بالخرطوم والكوة
بعد ما قرينا كلام الوالي العاقل وفاهم وفيهو ورانا الحاصل وان الدنيا ما مضمونة وكل زول يستعد و يشيل شيلته براه والله يبارك فيهو الواضح ما فاضح و مادام الوالي اشتري تلاتة مسدسات نحن ماحنقصر في حماية عمتكم الحاجة سعدية بت عثمان نور وحماية بيتنا والجيران لذا قررنا الاتي
1.تعيين نفسي اسحق احمد صديق موظف بالمعاش واليا علي منزلنا الكائن في حي الرياض الخرطوم
2.تعيين الحاجة سعدية عثمان حرمنا المصون رئيسا للجنة الامن و العمليات برتبة فريق
3. نسعي جادين لتوفير السلاح والعتاد اللازم و كلمنا الاخوان في سوق ليبيا وولدنا محمد في امريكا ولدنا مجدي في انجلترا لشراء 2مدفع جيم ثري سريع الطلقات لاستعمالي الشخصي واحد مدفع بازوكة وواحداربي جي لسعادة الفريق وذلك لان مشاكل الرطوبة وصعوبةالحركة تمنعها من استعمال المدافع الرشاشة كما نسعي لشراء دبابة T55 لزوم المشاوير و الزيارات العائلية
4.اعلن حالة الطوارئ حظر التجول بين السابعة مساء وحتي السابعة صباحا وكل من تسول له نفسه زيارتنا في هذه المواعيد فلا يلومنا الا انفسه
5.في ساعات النهار الزيارات بمواعيد مسبقة مع الحصول علي كلمة السر من رئيس للجنة الامن و العمليات
6.سيتم بناء ساتر امام البيت و ذلك لحمايتنا في جلستنا الصباحية وشراب القهوة وانا نحذر كل من تسول له نفسه من الاقتراب اننا سنكون مستعدين لكل من لايعرف كلمة السر
7 لاهلنا في الكوة و الدامر وفي ديار الغربه عليهم التاكد من حصولهم علي كلمة السر قبل التفكير في السفرالينا
.8 نريد ان نؤكد انا غير مسئوليين عن سلامة اي فرد لا يلتزم بهذه الاجراءت خاصة الزوار الغير مرغوب فيهم من ناس المويةو ناس العوائد وناس المجلس وجماعة اللجان الشعبية وخاصة ناس بسط الامن الشامل.
ولانامت اعين الجبناء
صدر تحت توقيعي يوم26/8
والي منزلنا القاطن الرياض مربع 7 الخرطوم
الحاج اسحق احمد صديق

هناك تعليق واحد:

  1. ابنائناالاعزاء
    شكرا علي دعمكم لقراراتنا ونؤكد اننا لانسعي للانفصال ولانعتبر انفسنا من المهمشين ولم يقع علينا اي ظلم تاريخي ولانريد اي جزء من كعكة السلطة وليس لدينا اي علاقة بأي سفارات اجنبية او دول او منظمات عالمية ولا تحركنا اي مصالح امبريالية لضرب دولة التوجه الحضاري.ليس لدينا مطالب للتفاوض ولا نمتلك وفد مقدمة او وفد مؤحرة.
    كل العاوزينو في الدنيادي السترة وحسن الخاتمه ما عندنا غير المشي للجامع ومواصلة الاهل والجيران و شراب القهوة الصباح مع الجرايد قدام البيت والظاهر في الزمن الصعب ده دي ما بتتحقق بأخوي وأخوك ساكت ومحتاجة ليها سلاح ووقفة رجال وتب نحن ما بنقصر رغم مشاكل الضغط و القلب و الكلي و ضعف النظر و صعوبة الحركة.
    لكن المحيرنا انو بعد كلام ولدنا الوالي [الله يحفظو ويخضر ضراعو علي صراحتو] ناس الامن والبوليس والجيش ديل حيسرحوهم ولا حيشوفوا ليهم شغلانة تانية المشكلة لو سرحوهم الحيقوم بالانقلابات منو.

    لكم الود

    ردحذف