🌹حاجه التومه مع ...الثوره...

🌹حاجه التومه مع الثوره🌹

حبوبتنا حاجه التومه تجاوزت المائه ورغم النظر الضعيف وصعوبة الحركه لكن احتفظت بي قوة الذاكره وفصاحة اللسان لي يوم وفاتها.كانت صارمه ليها هيبتها وكلمتها في الحله والرجال بيشاوروها وبيدوها مكانه.كان عندي مكانه خاصه وموده تهزم كل صرامتها وبتعطيني مساحه متفرده للمرح معاهاوالسؤال.

يوم بتشرب في قهوة الصباح وقلت ليها ( انت ياحبوبه الناس ديل بيخافوا منك ليه..)..اتكت ووطلعتني جمبها في العنقريب وقالت (يا جناي..ده ماخوف ده احترام..)(الناس دي زي البحر وانت زي الارض دي..لو بقيت واطي بيغرقوك..لو حفرت ليك جدول بيجوك في الجدول  وما بيوصلوك)..

اااها يا جناي من صغيره حفرت جدولي وعرفوا درب مويتي تمشي بي وين...واصلا هي مره واحده وماكررتها..

يوم وقفت لي حاج الطريفي في حوش بيته والناس تاني ما نسوها....

اولا بي التبادي حاج الطريفي ده والله انا شاكه انه لاحجه ولا الله قال يكون قضاها صعلقه مع عثمان ودنفيسه في بورتسودان وجا راجع...ياولدي في زول حجه ما بيعرف الفرق بين السعي والطواف...المهم ماعلينا..هو اصلا بعد قضى وقته في الصياعه والسكر وبعد وفاة جده سيد القبه قام يوم من الصباح في السوق قال ليهم امبارح جدي جاني في المنام واداني المشيخه وقال السنه دي تمشي الحج وتجي تستلم الطريقه.واهلك طيبين صدقوهوااا....اااها ومن ديك وعييك..

رجع من السفر ومن الطريفي المسخوط لي حاج الطريفي بشيل الفاتحه وبكتب المحايات وامام الجامع ورئيس التعاون وسيد الطاحونه ومعرس بت خلف الله التاجر.وبي قدرة قادر بقى كمان شيخ الحله...اااها بيت الجالوص بقى بيت طوب وعراقي الدموريه والسفنجه بقى جلابية تترون وعمه وملفحه ومركوب جلد نمر..اااها المفتش البيجي بينزل في ديوان حاج الطريفي السمح..والمدير البيمر على الحله بيعزموا في بيته ويوم الجمعه الفطور في الديوان بيتلم ناظر المدرسه والحكيماشى وناظر المدرسه وكل شئ في الحله بتحسم في صينية الفطور..

اااها ياولدي السنه دي كانت سنة الهدام والبحر فاض علينا وغرق الجروف وشال السواقي والناس بقت عدمانه فرطاقة النار...اااها الحكومه رسلت تعويضات للمتضررين وجاء المفتش..وفي جلسة الفطور وسلم القريشات لي حاج الطريفي..شيخ الحله...الناس منتظره الايام وحاتك حاج الطريفي ما جاب ليهم سيره..قام اولاد الحله مشوا ليهو عاوزين تبرع من قروش العوايد عشان يصلحوا بيهو المدرسه...قام اتنفض فيهم ونهرهم لكن خالك عبدالرحيم كان معاهم وما انكسر ووقف قال ياحاج الطريفي نحنا ماجايين نشحد وده للمدرسه نحنا ده حقنا كان ما  من العوايد ادينا من قروش التعريضات الما شفناها...حاج الطريفي قام اتنفض وهرج وكورك وقال بتخوني يا وليد يمين ما تعتذر وتسحب  كلامك ده شوف البسوي ليك..انا حاج الطريفي الجبت ليكم الطاحونه وعملت الفرن وعلمتكم تاكلوا الرغيف تجوا تطولوا لسانكم علي..

اااها الكلام وصلني وياجناي انا ماحرقتني تهديده وقلة ادبه اصلا هو معروف انا حرقتني خيابة الرجال القاعدين في الديوان وساكتين..

طواالي لفحت توبي ومشيت عليهو لقيتوا متكئ في الديوان كرشه قدامه وماسك سبحته يورجغ والما بخجلوا يضحكوا ليهو ويقرقروا..

 ااها جيت داخله كلهم سكتوا ..قام سيداحمد الامباشى عاين لي بي حقاره وقال لي ياحاجه التومه شنو البيجيبك على ديوان الرجال..ما اتلفت عليهوا وقلت ليهو ما شايفه لي راجل هنا..عندي كلمتين للطريفي ود السره بقول ليهو ومارقه..وكان كنتوا رجال ماكان احتجت اجي اقولن..اولا اسمع يا ود السره  الرغيف العاجبك ده صحي الما بيتشوفوا في بيت ابوك بيخلعك و نحنا ما بهايم بيتفضلوا علينا بالاكل..واولادنا ما بيسحبوا كلامهم ولابيبلعوا موقفهم..

الجنا بعد يلدوا مابيرجع للحشا..

ومابرجع للحبيان الواقف مشا...

      .واولادنا وقفوا ومشوا وعلمناهم عشان اليوم ده عشان يقولوا ليك الكلام الماسمعتوا من ابواتهم...ااااها افتح عينك واسمعني من الليله هم عاوزينهم يمسكوا التعاون..ويستلموا التعويضات ويوزعوها..عجبك عجبك ما عجبك يمين ووحات ابوي ...بكره انا راكبه اللوري من الدغش وماشه المديريه واجيب المفتش من يده يراجع حسابات التعاون ورقه ورقه ويشوف الدقيق كان بيمشي وين والتعويضات مشت وين....والعوايد البتلمها وماتوصلها المجلس...اههها وللقاعدين معاك الراجل فيهم خليهو يوصلني  يحنس ولا يحلف علي كان ما طلعتوا حفيان..وانت ياود السره كلامي واضح ياتبقى عليهوا يا قوم حضر شنطتك عشان باقي عمرك بخليك تقضي في السجن...

     اااها واقول ليك كلمه أخيره اولادنا ديل مادام كبروا و اتعلموا الكلام...سحب كلام مافي..وبيقوا ماخايفين من زول تاني رجعه مافي...وغتغيت مافي

وسكات مافي..وطال الزمن او قصر الوليدات ديل هم مستقبلنا ..هم  الحيمسكوا التعاون والطاحونه والبتعملوا فيهو فرفره سااااي..واخير سلمها ليهم بي اخوي واخوك.....

اااها ياولدي .........

نصيحه ليك و للزمن.

ما تبقوا غبيانين زي حاج الطريفي وشلته....ياولدي.كل زمن بي رجاله وكل بلد بي ديوكا...ويوم الوليدات يكبروا ويكون عندهم كلمه اسمعوا ليهم  ورتبوا ليهم دروبهم وما تعارضوهم وما تقيفوا ضدهم اصله السيل  كان هدر ما بتوقفوا القيزان..بشيل البلاقيهوا...وما بقيف...الا يوصل البحر...... وكل الفي طريقه.....ح يسقط بس....

مجدي اسحق

.