ود اسحق... إنهزم يارجاله بالأنجليزي

.....وداسحق انهزم يارجااله........
 ......
الليله...
  المفعوصه رموزه اخر العنقود..قاعدين نتونس وانا مجتهد في النكت والحكاوي ...قبلت علي وادتني عين وبانجليزي فاقع زي بتاع مرسي الزيناتي..
                     Baba you are boring
جد حرقتني في حناني....واتجلدت وقلت ليها..زي شكلات نسوان الديم
(هووووي انا لطيف وظريف) وتميتها بالانجليزي الماخمج
               (everyone finds  me funnnnnny).
ولا اهتزت فيها شعره من ردي الكنت قايله منطقي..وخاصة لمن قالت لي
                       (yes ..thats true)
وقبلت علي بي نظره..وكملت باقي الكلام..ورسلت لي حزمه من العيار التقيل
               ( They don't live with you....
You are like....NUTTELA.....people can enjoy it once in a while... but if you have it everyday it is going to kill your appetite and on the long run you end up with heart attack or stroke )........
اللهم لا اعتراض في حكمك وقع الكلام زي موية النار....كضمت.وفهمت..وقررت من الليله.....اووووعكم واحد يحاول يعمل ظريف ويقول لي كانت بتهظر...انا معكنن وروحي مكرجه..وزول انتحار ومضاربه ساااي....يامستهبلين تتضاحكوا معاي وانتوا خاتين فيني الف راي ...الليله.. بركه المفعوصه دي فضحتكم ....ومن الليله دي.... تاني البجيب قدامي سيرة ناتيلا..ولا سيرة شيكولاته ساي مايلوم الا نفسه..
وخلاص مرقنا للربا والتلاف...

والليله .سجمك.ياوداسحق.و...ياشماتة ابله نظيره فيك..

مجدي اسحق