🌹حاجه التومه..... وإعتذار الطاهر حسن التوم🌹
إنتشر مقال في الاسافير للطاهر حسن التوم إعتذارا على وقوفه مع الخطأ لعدم اتضاح الحقيقة له.. وأنا أطالع سطوره أرى بينها صورة حاجة التومه وهي بتسمع في إعتذار شيخ الطريفي.
الحله كلها بتعرف حساسية حاجه التومه من شيخ الطريفي والناس ببقولوا ده سببه انه هي معروفه بالصراحه وانها دغريه وما بتخاف وشيخ الطريفي بتحاشاها وخاصة هو عمايله ما بتتشكر كان في العموديه ولا التعاون او اللجنه الشعبيه... حاجه التومه بتحكي للنسوان وتقول(والله الزول ده شدة ما بكجنوا لمن أسمع إسمه سااي بطني بتتكوفر).
قالوا اليوم داك وهي ماشه على السوق والناس كلهم وقفوا يتصنتوا لمن شافوا شيخ الطريفي قام من عنقريبه وجاء على حاجه التومه(ياحاجه والله انت زوله مبروكه الليله كنت جاييك في البيت) ردت ليه بي طرف لسانها ووشها واضح عليها الضيق والقرف(يزورنا النبي انشاءالله خير)... عمل ما فهم عدم حماسها وواصل(والله السنه دي المنادي نادى للحج.. والواحد قال لي روحه الزول لازم يمشي لي ربه وهو نضييف... وانا في موضوعا ليهو 30سنه في قلبي ناوي اعتذر ليك عنه واستسمحك فيهو... اااها تذكري زراعتك الخربت والبهايم الدخلت في حواشتك... اااها البهايم ديل ما طلقن براهن لكن ده العمده إدريس الله يرحمه ويغفر هو الجابهم... وانا كنت شاهد الله يعلم ما رفعت اصبع معاه لكن الشيطان غلبني ما قدرت اوقفه... وما اتكلمت.. اااها دايرك تسامحيني وتعفي لي على سكاتي... ) الكضروا الموقف حلفوا قالوا حاجه التومه من الزعل لمن عيونها بقت حمر.. لكن صوتها مارتفع وبي كلام زي الرصاص ردت ليهو(30 سنه انت ساكت وانا متعذبه.. الزرع ضاع.. وناس البنك قلعوا الحواشه وحسين ولدي خلى المدرسه عشان يرعي بي البهم ويصرف علينا ومن اليوم داك لا ضقنا عافيه ولا راحة بال... اااها انت بي سكاتك العمده ادريس بقاك شيخ الحله وبقيت العمده ورئيس التعاون وبدل الحواشه بقى عندك خمسه... اااها كان شاركت يبقى احسب لي خسارتي ولدي الاتهمل ومستقبله ضاع ده خليهو وريني زراعتي في المده دي كانت حتكون قدر شنو ورجعها لي.. واقول ليك كفايه 3حواشات من حواشاتك الخمسه وبقرتين من مراحك... اااها كان بس ما شاركت من هسه بي دربنا نمشي للمحكمه واشيل حقي من اولاد حاج ادريس... اااها كان ده ما بتقدر عليهو.. إعتذارك مالازمني وزولا لا بقدر يوقف الشين ولا بقدر يقول النصيحه عرفته ما بتجيب غير الغم وبتقصر العمر )..
والحله كلها بتحكي انه خشمه مافتحه..... ولغاية حاجة التومه ما ماتت لو ظهرت في طرف الحله شيخ الطريفي كان بخلي ليها الدرب..
فيا الطاهر ياخوي..
إعتذارك مبروك عليك.. وخطوه ما بننكرها عليك وباب التوبه مفتوح.. وما فينا زولا عنده صكوك التوبه يوزعها على الناس.
شعبنا هو المعلم والكتاب.. وفي شريعته التوبه مقبوله لكن بي شروطها...
شروط التوبه اولها الاعتراف بالخطأ والسعي لإصلاحه.
الإعتراف بي جبروت الانقاذ وظلمهم.
ودورك في التمكين والظلم..
ودورك في التلميع وإطالة عمر نظام البطش.. و اي ابواب قد فتحت فتطاولت في البنيان والمناصب على حساب الشرفاء وأصحاب الحق والكفاءه.
إنها كانت دولة الظلم والإفساد فإن لم تشارك وتلوث يداك فمواقفك قد تلوثت بالصمت والمشاهده.. فلن يعفيك من مسئوليتها وعليك ضريبة أن تتطهر من رجسها
بان تقدم كتابك لشعبنا وبه كل ما تعلم من مواقع الافساد والظلم..
فإن أنكرت معرفتك بمواقع الظلم والإفساد.. رغم صعوبة ان نبتلع ذلك.. ولكن لانتهمك بالكذب فنحن لانحاكم النوايا ولسنا من يحاسب بلا بينة ولا دليل.. ولكن نقول لك لا خير في إعتذار ممن كان مغيبا لا يسمع ولايرى عاش الانقاذ وفتحت له الأبواب فلم يرى في ذلك تجاوزا وتعدي على الاخرين.. وشاهد كيف تدور الامور فلم يرى فسادا وراى الحرب الاعتقال والتعذيب والبطش بالابرياء ولايرى في ذلك ظلما أو تجبر.
لا يعيب الطاهر وأمثاله كثر فقط ان يكون شاهدا على عصره أعمى من الإفساد أصم عن أصوات المظلومين... ولكن مايعيب انه قد رأى في الظلم جمالا وفي البطش نغما يطرب له فيزين للسلطان أفعاله ويدعم السلطه فيطيل عمرها ويعطي لبطشها وجبروتها قوة وغطاء..
ان رسالة شعبنا لكل من يريد ان يصلي في محراب الثوره من حارقي البخور والصامتين.. أن يقوموا بمناسك التحلل لوجه شعبنا الصابر.. ليس تحلل الافك وتبرير الفساد.
تحللا صادقا محكوما بالنية والعمل فيبدأ بان يحرم ويتطهر من الادران.. وان يترك في باب معبدها كل ما ينؤ به ظهره من مكسب ومنصب وجاه إكتراه ظلما او صمتا عن معاناة شعبنا... ويحمل كتابه بيمينه ليعطي الحقوق لأصحابها مسطرا بحروف الحقيقة كل خطىئة شاهدها وكل منكر سمع به..وان يتعهد في ركوعه وسجودها ان لا يعود مرة أخرى لدروب الضلال والرذيله ولو بعد حين..
فإن لم تسرك شروط دروب التوبة والتعافي. فلا نقول سوى حكمة حاجه التومه...
(زولا لا بقدر يوقف الشين ولا بقدر يقول النصيحه عرفته ما بتجيب غير الغم وبتقصر العمر )..
وإن قبلت شروط التوبة حبا وكرامة.. حينها ستجد عدالة ثورتنا.. وتسامح شعبنا الذي رغم الإحن مازال لا يؤمن بالتشفي والإنتقام ويعيش متوازنا وهو يؤمن بحريه سلام وعداله...
وإنه لشعب عظيم يستحق التوبة له والعودة لحظيرة عفوه ومحبته....
مجدي إسحق
15 أغسطس
ليست هناك تعليقات:
إرسال تعليق