🌹.. حاجه التومه.... .سكر التعاون... والفريق برهان🌹

🌹حاجة التومه.... .سكر التعاون... والفريق برهان🌹..

أعلن الفريق برهان إقالة النائب العام مولانا وليد سيداحمد لبطء إجراءات محاكمة رموز نظام الإنقاذ..

حقيقة شر البلية ما يضحك.. ولم نستطع الضحك على ألامنا المتزايده ولم نجد حاجه التومه لتخفف علينا جزء من جراحنا وغضبنا المكبوت كما خففت على ناس حلتنا يوم زنقت العمده.

حاج عبدالرحمن ما معروف مشى الحج ولا مامشى نزل بورتسودان لي ود أخته ورجع بعد شهرين وقال مشى الحج وفي ذمة الناس قال ليهم أكتر الأركان المهمه وإنبسط فيها زيارة قبر المصطفى. المهم مشى العمده.. ورجع العمده ومعاها سبحه دايما في يده وبقى رئيس التعاون ومجلس الأباء والمجلس الشعبي والقاضي المحلي.. بقى الكل في الكل ومافي زولا بيخالفه.. لانه كان عارضته في المدرسه بي قدرة قادر تلقى صرفتك في تموين التعاون سقطت الشهر داك. وان إختلفت معاه في محكمة العمد تلقى العوايد بتاعتك زادت من ناس المجلس الشعبي.

عشان كده لمن قرر يشيل شيخ الطيب من التعاون ويجيب عباس ودالحرم الحله كلها زعلانه لكن منو البيقول البقره في الابريق.

كان القرار ده حيمشي في رقاب الناس لولا حبوبتنا حاجه التومه الله يديها العافيه ويطول أيامها.

وقفت ليهو في باب الديوان ولمن قال ليها العمده(خبارك ياحاجه التومه ما انتظرتيني في حوش العوين وجايانا في مجلس الرجال).. طوالي عرف إنها ناوية الشر لمن قالت ليهو(المعاك ديل ماشايفه فيهم راجل).. طوالي سكت.

ناس الحله لي الليله حافظين كلامها بالنص(عليك الله ما بتخجل ياعمده داير تشيل شيخ الطيب الرجل النضيف ونزيه وتعين عباس ودالحرم السكران الحيران في التعاون... ما تخجل تقول عذرك شيخ الطيب بطئ وحركته تقيله) (صحي بطئ عشان بيقعد الليل كله بيقسم السكر بالتساوي على ناس الحله ويتأكد نصيبهم بالتساوي كل زول زي اخوه كان ربع رطل لو نص رطل.. أها كان السكر إتأخر يوم ولا يومين مايتأخر)(لكن عارفين ليه عاوز ود الحرم عشان ذمته سايبه حنشوف السكر بسرعه بتوزع شوال هنا وشوالين هناك وباقي الحله يحرم عليها.. ما شفناه لمن كان ماسك الوابور يسقي حواشاتك لمن تدفق حتى يسقى باقي زراعة ناس الحله) (إنت لو حريص في سرعة توزيع السكر ما تساعد شيخ الطيب وتديهو واحد من الغفر المشغلينهم ليك بس فالحين يمشوا يجيبوا السمن البلدي من الحله الفوق.. ويجيبوا الطلح لي عروسك التانيه الفي عمر بناتك)..

حاجه التومه ولا إنتظرت لي رد العمده لكن شيخ الطيب إستمر في التعاون لغاية ما إتوفى ليه الرحمه.

أها حبوبتنا حاجه التومه لو لاقت البرهان كان سمعته الحقيقه الماعاوز يسمعها وكان قالت ليهو(عليك الله خلينا من الكلام المغتغت وفاضي وخمج.. الناس كلها عارفه إنك زعلت من النائب العام لمن قال ما طبخ معاكم المجزره و رفض تكون لجنة التحقيق من العساكر ونظام زيتكم في بيتكم.. وقال ليكم بالواضح الحقيقه حتتجغمس لأنه العساكر متهمين في روحهم) (ونجئ لي حكاية بطئ في محاكمة ناس الإنقاذ.. عليك الله ياولدي ما بتخجل ما لقيت ليك طبخه أحسن من دي.. جبتها شينه وريحتها طاقه )(إنت مادام مستعجل على العداله ما إنت عندك السلطه والشرعيه عملت بيها شنو.. امانه في ذمتك المفسدين بس كانوا عشرين زمن الانقاذ ده كله.ديل كل الموجودين في كوبر.. . وإنت عارف الأمن الإقتصادي عنده ملف عن أي واحد.. لا طلعت قرار تجميد أرصده.. لا حظرت سفر واحد... والقاعدين وعاوزين يحققوا معاهم بالسلاح رفضوا للنائب العام...أنت ماعملت أضان الحامل طرشه وبعد كده طلعوا من المطار زي السلام عليكم.. وبلا خجله تقول ماعارفين طلعوا كيف... ولمن نكتشف إن أخو البشير متجدع في بلاد الدنيا بعد قلته معتقل بلا خجله بس تقولوا.. غلطه.. ) (ااها الشالوا بالفساد رجعته... والقال خلوها مستوره داير تستوزروا. والمطلوب في بلاد الله بالسرقه عملته من مشايخ البلد وقابلته... نزاهة وعدالة شنو الجاي تتكلم عليها)..

مافي شئ يتقال والحكايه معروفه لكن على مولانا الوليد سيداحمد يطلع بيان يشرح سبب إقالته وللتاريخ مطالب يخت النقط فوق الحروف.. وما يكون كبش فداء لي مجلس لا يخفي على أحد كذبه وفضائحه.. مادام حاجه التومه ما موجوده عشان تدافع عنه.

مجدي إسحق