نصيحة من حاجة التومة بت خيرالله للسيد محمد عثمان والسيد الصادق
سالمت حاجة التومة وما كترت عليها الكلام رغم جيتي مخصوص للبيت عشان آخد لي معاها خشم خشمين لأني لقيتها رابطه راسها من الصداع وظاهر إنو رامياها الجبنة مع الصيام.
جريت لي كرسي لي تحت الشجرة و قعدت جمب عنقريبها.
فتحت عيونها وقالت لي إنت ياولدي ناس سيدي ما يشوفوا ليهم شمشار.
قلت ليها شمشار شنو ياخالتي إنت الصيام طلع ليك في رآسك.
إتصلحت في رقدتها وقالت لي إنت ما بتعرف الشمشار
قلت ليها والله بعرف الشمشره لكن الشمشار ده ما بعرفو?
قامت من رقدتها وقعدت مقابلاني وقالت
لمن واحد يكون عاوز يعرس برسل شوية من أهلوا لأهل البنت لزوم التعارف.أهل الولد بيجو شايلين حبة حلاوة وعصير وأهل البنية بيكرموهم شديد وفي بالهم الدهب والقروش والخمج بجيهم في سد المال.أها اليوم ده بقضوا نضمي ساكت نحن أهلنا ناس منو وأصلنا من وينوو جنسنا من وين وياك يا شكر لي بعض وضحك أهل العريس بيضحكوا ويلهطوا في المجاني ده وأهل العروس مبسوطين ورامين لي قدام ومقدمين السبت.
أها العريس عشان عارف الراجيهو بيشوف ليهو طريقة مخارجة أها يعمل شنو يفتش ليهو شمشار عشان يخارجوا.......... والشمشار ده بكون زولا بعرف أهل العروس شديد وبعرف جزء من ناس العريس أها والناس في نص التعارف والضحك يقوم علي حيلوا ويبدأ ليهو خطبة قصير يشكر العروس وأهلها والعريس وأهله وكيف بيفتخربإنه بيعرف الأسرتين وأفضالهم وكرمهم وأخلاقهم وإن خير البر عاجله ويختمها بأفضلهن أقلهن مهورا وإنو الناس أهل ومافي داعي للتكلفة والتطويل والناس تعقد طوالي الآن ويختمها بالفاتحه......... ووتسمع ليك صدقت والله من هنا وأحسنت من هناك وكم علي اليمين وحّرم وعلي الطلاق وأم العروس في نص أحلامها يجيها الخبر......مبروك مبروك الرجال عقدوا
أها ياولدي ناس سيدي قعدات التعارف مع القشير دي ما طالت بالحيل( حاجة التومة من إعتقال السيد محمد عثمان بقت ما بتذكر إسم رئيسنا المؤمن الا بالقشير وكتير تلقاها تهمهم طير طير يالقشير).
أها الحيكومة ما عروسا ساهله وما بقطعوا رحطها بالرخسة.........
( وذاتو القشير ما قال ليهم والكلام فات طرف أضانهم قال ليهم شلناها بالقوه والدايرها إلا إقلعها بالقوه).........
أها بالواضح الما فاضح مهرها بقى معروف وشيلتهاوسد مالها ما بجئ بالساهل.
أها لو مهرها ده كتيرعلي ناس سيدي ولو ده شعرا ماعندهم ليهو رقبه يبطلوا المساسقه والكلام الكتير أها التعارف براهوا ما بوصلهم للعروس أخير ليهم يشوفوا ليهم طريقة شمشار بدل البهدله دي .................
ليست هناك تعليقات:
إرسال تعليق